"کتھارس"

"کتھارس"

کسی رت کا کوئی دکھ ہو
کوئی سکھ ہو
ہمیں محسوس ہوتا ہے
یہی "احساس" ہونے کی علامت ہے
ہماری زندگانی کی علامت ہے
تمہیں حیران ہونے کی ضرورت کیا ؟
چلے جاؤ

تمہیں کیا واسطہ اس سے ؟
کہ ہم تنہائیوں میں کس طرح رہ کر
گزر اوقات کرتے ہیں
تمہیں ہو کیوں غرض اس سے ؟
کہ جیتے ہیں کہ مرتے ہیں
چلے جاؤ

ہمارے زخم بھرنے کے نہیں ہیں ان دلاسوں سے
کوئی دیکھے تو کیوں دیکھے
کہ کیسے صبر آتا ہے
ہمیں تاریک راتوں میں
کوئی دیکھے تو کیوں دیکھے
کہ کیسے محو رہتے ہیں
ہم اپنے ساتھ ، باتوں میں
چلے جاؤ

ہمیں محسوس کرنے دو
ہمارے زخم بھرنے دو
میرے ہمراز آؤ تو
بُجھا دو روشنیاں ساری
غبار اس دل کا نکلے گا
بہت تاریک کمرے میں
مجھے اب ہچکياں لیتے
کوئی بھی دیکھ پائے کیوں ؟
میرے انجام پہ آخر
"وہ چہرہ" مسکرائے کیوں ؟
چلے جاؤ
ہمیں تو اس سمے گھر کے
درودیوار بھی اچھے نہیں لگتے
چلے جاؤ.....!!
چلے جاؤ.....!!